Azərbaycan yeni yarışlar hazırlayır

Azərbaycan Qış İdman Növləri Federasiyasından bildirilib ki, “Şahdağ” turizm mərkəzinin xizək enişləri beynəlxalq FIS standartlarına çatdırılıb ki, bu da ölkədə slalom, nəhəng slalom və super-gigant üzrə beynəlxalq xizək yarışlarını keçirməyə imkan verəcək.

Ötən həftə Şahdağ turizm mərkəzinin yamaclarında lazımi prosedurların və yoxlamaların başa çatdırılması barədə Beynəlxalq Xizək Federasiyasına məlumat verilib. Mərkəz müvafiq sertifikat alıb, Azərbaycanda yeni yarışların beynəlxalq federasiyanın təqviminə daxil edilməsi üçün tədbirlər keçirilir.