Azərbaycanda turistlərin sayı artıb

Dövlət Statistika Komitəsinin məlumatına görə, bu ilin 7 ayında ölkəmizə dünyanın 183 ölkəsindən 1 milyon 143,6 min əcnəbi və vətəndaşlığı olmayan şəxs gəlib. Bu göstərici ötən ilin müvafiq dövrü ilə müqayisədə 37,4% çoxdur. Ən çox turist Rusiya (32,8%) və Türkiyədən (18,2%) gəlib. Gələnlər arasında kişilər 70,5%, qadınlar isə 29,5% təşkil edib.

Yanvar-iyul aylarında MDB ölkələrindən Azərbaycana 477,1 min nəfər səfər edib ki, bu da 2022-ci illə müqayisədə 1,7 dəfə çoxdur.

Azərbaycana gələn əcnəbilər və vətəndaşlığı olmayan şəxslərin 71,1 faizi hava, 27,6 faizi dəmir yolu və ya avtomobil, 1,3 faizi dəniz nəqliyyatı ilə gəlib.