Azərbaycanda yüksək sürətli idman avtomobillərinin yarışı baş tutub

Azərbaycan Avtomobil Federasiyası ölkədə avtomobil idmanının kütləviləşdirilməsi məqsədilə Bakıdan Lənkərana yüksək sürətli idman avtomobillərinin yürüşü təşkil edib. Heydər Əliyev Mərkəzindən hərəkətə başlayan idman avtomobilləri paytaxtın səfalı guşələrindən keçərək Lənkərana yollandı və burada “Avropa şəhərciyi”nə baş çəkdilər. Həmçinin Lənkəranda Hərbi Hava Qüvvələrinin pilotlarının iştirakı ilə drift şousu da daxil olmaqla xüsusi maarifləndirici və əyləncə proqramı təşkil olunub.

Qaçış iştirakçıları üçün avtomobillərlə bağlı suallardan ibarət viktorina keçirilib, qaliblərə hədiyyələr təqdim olunub. “Ən çox bəyənilən avtomobil” və “Ən maraqlı geyim tərzi” nominasiyaları üzrə qaliblər də mükafatlandırılıb.

Tədbir çərçivəsində Avtomobil Federasiyasının əməkdaşları Lənkəran şəhər qarışıq tipli uşaq evində olub, bayram süfrəsi təşkil edib, uşaqlara hədiyyələr və məişət əşyaları təqdim ediblər. Lənkəranın bütün 130 şəhid ailəsi və veteranlarına da Federasiya tərəfindən hədiyyələr verilib.