Azərbaycanlı dirijor beynəlxalq opera festivalında çıxış edib

Azərbaycan Dövlət Akademik Opera və Balet Teatrının baş dirijoru və musiqi rəhbəri, Azərbaycanın Əməkdar Artisti Əyyub Quliyev Almaniyanın Badendorf şəhərində keçirilən beynəlxalq opera İmmlinq Festivalının bağlanış mərasimində iştirak edib. Onun rəhbərliyi ilə orkestr dahi Azərbaycan bəstəkarı Qara Qarayevin “Yeddi gözəl” baletindən parçalar ifa edib.

Qala-konsert 4 saata yaxın davam edib. Burada müxtəlif ölkələrdən opera ulduzları iştirak edirdi. Festivalın səhnəsindən dünya opera musiqisinin ən yaxşı nümunələri – Coakkino Rossini, Cüzeppe Verdi, Cakomo Puççini, Françesko Silea, Jül Massenet, Georges Bize, Şarl Fransua Quno, Riçard Vaqner, Pyotr Çaykovski, Modest Mussorgsky, Zaxaria Paliashvilinin operalarından ariyalar, duetlər, ansambllar səslənib.