Bakıda beynəlxalq film festivalı keçiriləcək

Avqustun 31-dək XII Bakı Beynəlxalq Qısa Filmlər Festivalında iştirak üçün müraciətlər açıqdır. Bunun üçün yaşı 35-dən aşağı olan rejissorlar layihənin beynəlxalq və yerli proqramlarında 30 dəqiqədən, Cinemobil bölməsində isə beş dəqiqədən çox olmayan qısametrajlı filmlərini təqdim etməlidirlər. Festival noyabrın 10-dan 15-dək paytaxtda keçiriləcək.

Film festivalı çərçivəsində “Ən yaxşı bədii film”, “Ən yaxşı sənədli film”, “Ən yaxşı animasiya filmi”, “Ən yaxşı sosial çarx”, “Ən yaxşı rejissor” və “Ən yaxşı ssenarist” nominasiyaları nəzərdə tutulub. Qaliblər festivalın baş mükafatı “Qızıl Nar” və pul mükafatlarını alacaqlar.

Müsabiqə proqramı rəsmi olaraq noyabrın 1-də elan olunacaq.