İpək Yolu sona yaxınlaşır

Şəkidə bazar ertəsi “Marhal” kompleksinin yay teatrında başlayan “İpək Yolu” XII Beynəlxalq Musiqi Festivalı bu gün başa çatır. Tədbir zamanı Azərbaycanın görkəmli sənətçiləri ilə yanaşı, Türkiyə, Çin, Özbəkistan və Qazaxıstandan gələn qonaqlar tamaşaçılar qarşısında çıxış ediblər.

Festivalın bu il ölkəmizdən iştirakçıları Əməkdar Artist Əyyub Quliyevin rəhbərliyi ilə Azərbaycan Dövlət Akademik Opera və Balet Teatrının artistləri, Fikrət Əmirov adına Dövlət Mahnı və Rəqs Ansamblı və “Zəfər” muğam qrupu olub.

Dövlət Sərhəd Xidmətinin Nümunəvi Hərbi Orkestrinin ifasında Azərbaycan xalqının ümummilli lideri Heydər Əliyevin xatirəsinə həsr olunmuş vətənpərvərlik mahnıları səsləndirilib.