Mirzə Şəfi Vazehin 230 illik yubileyi konsertlə qeyd olundu

Fikrət Əmirov adına Gəncə Dövlət Filarmoniyasında “Gəncə və gəncəlilər” layihəsi çərçivəsində görkəmli Azərbaycan şairi və mütəfəkkiri Mirzə Şəfi Vazehin 230 illik yubileyi münasibətilə ədəbi-bədii gecə keçirilib. Konsertdə Mirzə Şəfi Vazehin qəzəlləri və muğam-xoreoqrafik kompozisiyaları səsləndirilib, foyedə tamaşaçılara şairin həyat və yaradıcılığına həsr olunmuş sərgi təqdim olunub.

Mirzə Şəfi Vazeh 1792-ci ildə Gəncədə memar ailəsində anadan olmuşdur. O, “ifadəli, aydın” mənasını verən Vazeh təxəllüsü ilə yazmışdır. Onun poetik əsərləri bütün dünyada tanınır: qəzəlləri, müxəmməsləri, rübailəri, məsnəviləri və s. Əsərlərinin əsas mövzularını satira, lirizm, romantik sevginin tərənnümü, eləcə də feodal cəmiyyətinin yaramazlıqları təşkil edirdi.