Paytaxtda animasiya festivalı keçiriləcək

Sentyabrın 6-dan 10-dək Bakıda, Nizami Kino Mərkəzində ANİMAFİLM Uşaq və Böyüklər üçün VI Beynəlxalq Animasiya Festivalı keçiriləcək. Film nümayişləri ilə yanaşı, beynəlxalq münsiflər heyətinin üzvləri və xüsusi dəvət olunmuş qonaqlarla görüşlər, ustad dərsləri və seminarlar keçiriləcək. Oskar mükafatlı rejissor Maykl Dudok de Vit və kanadalı animator Metyu Layon ustad dərslərinə, gürcü rejissor Ana Çubinidze və hindistanlı Tehzib Xurana isə uşaqlar üçün animasiya seminarlarına rəhbərlik edəcəklər.

Festival üç əsas proqramdan ibarət olacaq: rəqabətli, qeyri-rəqabətli, həmçinin peşəkarlar üçün proqram. Müsabiqədə 46 ölkədən və 174 filmdən 13 ölkə 39 film iştirak edib. Filmlər 2 beynəlxalq və 2 yerli kateqoriya üzrə yarışacaq. Festivalın direktoru, Azərbaycan Animasiya Assosiasiyasının sədri Rəşid Ağamalıyevin sözlərinə görə, biletlərin satışından əldə olunan gəlir ölkədəki qadın rejissorların dəstəklənməsinə sərf olunacaq. Festivalın mükafat fondu 2300 dollardır.