Paytaxtda Bakı Piano Festivalı keçiriləcək

İyunun 15-dən 29-dək paytaxtda ikinci Bakı Piano Festivalı keçiriləcək. Festivalda Azərbaycanın və xarici ölkələrin tanınmış musiqiçiləri – Şahin Növrəsli, Səidə Tağızadə, Arslan Növrəsli, Nurlan Növrəsli, Səbinə İsmayılova, Eldar Məmmədov, Naibə Şahməmmədova, Nərgiz Əliyeva, ABŞ-dan Helen Mercier, Macarıstandan Norbert Kael, Almaniyadan Vadim Abramov, Avstriyadan David Six və s. çıxış edəcəklər.

Festivalın açılış mərasimi iyunun 15-də Heydər Əliyev Mərkəzində baş tutacaq. Digər günlərdə Beynəlxalq Muğam Mərkəzində və Rotunda Roof Garden-də konsertlər keçiriləcək.

Festivalın təsisçisi və direktoru caz pianoçusu və bəstəkarı, Azərbaycanın Əməkdar Artisti Şahin Növrəslidir. Tədbirin təşkilatçıları Heydər Əliyev Fondu və Pasha Holdingdir.