Soyuq Əllər, İsti Ürək 2023-2024 xeyriyyə yarmarkası açıqdır!

Bakıda Fəvvarələr Meydanında “Soyuq Əllər, İsti Ürək 2023-2024” xeyriyyə yarmarkası açılıb. Açılış mərasimində Aygün Kazımova, Brilliant Dadaşeva, Sevda Ələkbərzadə, Lalə Məmmədova, Elnur Məmmədov, Elton, Nərmin Kərimbəyova, Rəsul Əfəndiyev, Aysel və başqa ulduzlar çıxış ediblər. Yarmarka 15 yanvar 2024-cü il tarixinədək hər gün saat 11:00-dan 23:00-dək açıqdır.

Bu il yarmarkada 64 böyük və 20 kiçik ev,3 ikimərtəbəli restoran, oyun sahəsi, fotozon, 4D kinoteatr, dəhşət otağı, labirint otağı, Qrinç evi, müxtəlif köşklər və temalı guşələr, Şaxta babanın evi və böyük Milad ağacı var.

Soyuq Əllər, İsti Ürək xeyriyyə yarmarkası 2013-cü ildən etibarən hər il Yeni il qabağı keçirilir. Evlərin kirayəsindən və sponsorların maliyyə dəstəyindən əldə olunan bütün gəlirlər müxtəlif xəstəlikləri olan uşaqların müalicəsinə və əməliyyatlarına sərf olunur.