Üzeyir Hacıbəyli Beynəlxalq Musiqi Festivalı başlayır

Sentyabrın 18-dən 28-dək Bakı, Gəncə, Şəmkir və Şuşa şəhərlərində Üzeyir Hacıbəyli XV Beynəlxalq Musiqi Festivalı çərçivəsində açıq havada və məkanlarda konsertlər, tamaşalar, sərgilər, elmi konfranslar, ustad dərsləri və digər tədbirlər keçiriləcək. Festivalın açılışı günü Şuşada Azərbaycan Dövlət Akademik Opera və Balet Teatrının “Leyli və Məcnun” operası, Bakıda Fəvvarələr Meydanında Azərbaycan Dövlət Nəfəsli Alətlər Orkestrinin konserti olacaq.

Festival zamanı Heydər Əliyev Mərkəzinin parkında Bakı şəhər uşaq musiqi məktəblərinin 200 şagirdindən və Azərbaycan Dövlət Uşaq Filarmoniyasının solistlərindən ibarət Xalq Çalğı Alətləri Orkestrinin çıxışları olacaq. Həmçinin, Bakının iri ticarət mərkəzlərindəki xüsusi məkanlarda tanınmış müğənnilərin ifasında Hacıbəylinin vokal əsərləri karaoke formatında səsləndiriləcək və hər kəs onlara qoşula biləcək.